PLESIER

Ja, Fanie kan enigeen baie vertel van die mielie!

Hy het sy hele loopbaan gewy aan die boere en hul gesaaides - hy kan jou alles vertel van die grondvoorbereiding, planttyd, voedingsprogramme en natuurlik die eindproduk.

Hy het saam met die boere die lande ondersoek en saam met hulle vir reën op die regte tyd gebid.  Mens kan mos nie ànders nie – dis mos hulle inkomste en hul grootste liefde!  Sy grootste beloning en genot is en was egter, om die heerlike mielies uit te soek, blare af te stroop en dan volgens sy presies-berekende tyd te kook!  Almal in ons familie weet dat dit seker een van sy gunstelingkossoorte is, en nét hy kan so heerlik  toe-oog met plesier daaraan smul!

 Mielie video

Een ding wat my baie plesier verskaf, is om langs die strand te stap en al die wonders van die natuur

waar te neem.  Die branders wat nimmereindigend  na die strand toe rommel,  bring ‘n rustigheid in my gemoed.  Dit maak nie saak wat mens probeer om dit te keer nie, die branders sal aanhou en aanhou kom!  Met die stap op die seesand, is daar ‘n menigte klein wonderwerkies wat ek ondersoek en ek het altyd my kamera byderhand om dit vas te lê.  Stap vir stap op die sagte sand en die klank van die bruisende branders is goeie terapie vir enige rustelose siel.  Wanneer ek aan die strand dink, sien ek in my geestes-oog, hoe ons op ‘n piekniekkombers onder ‘n helderkleurige sonsambreel ons flessie koffie en houer met toebroodjies nader trek!

Toe ons Kaapse kleinkinders nog baie klein was, was hulle grootste bederf om see toe te gaan en te gaan piekniek hou.  Ek moes alles, saam met hulle, gereed kry vir ons piekniek :  fles, broodjies, koekies, lekkers, vrugte, kombers, sambreel – en natuurlik sonbrandsalfie.  Die voorbereidings was sò deel van ons plesier en die afwagting was deel van ons groot pret!  Die emmertjies en grafies moes ook saamgaan.; sandkastele moes gebou word, en gate moes gegrawe word, en hulle het darem ook uitbundig die water aangedurf  Dit was altyd groot pret en vreeslik plesierig!  Maar … die oppak en huiswaarts keer was egter nie so plesierig nie, maar beloftes vir nog ‘n strandpiekniek in die nabye toekoms, het darem getroos.

Linnie

4 Mei 2O15